നിക്ഷിപ്ത താത്പര്യത്തിന് ഗുരുനിന്ദ നടത്തരുതെന്ന് സുധീരന്‍

നിക്ഷിപ്ത താത്പര്യങ്ങള്‍ക്കായി ഗുരുനിന്ദ നടത്തരുതെന്ന് കെ.പി.സി.സി പ്രസിഡന്റ് വി.എം സുധീരന്‍. മദ്യരാജാക്കന്മാരുടെ പണം കൊണ്ട് ശിവഗിരി മഠം നിര്‍മ്മിച്ചുവെന്ന വ്യാഖ്യാനം ശരിയല്ലെന്നും അദ്ദേഹം പറഞ്ഞു.

ഈ വിമര്‍ശവുമായി രംഗത്തുവന്ന എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശനുള്ള പരോക്ഷ മറുപടിയായിരുന്നു സുധീരന്റെ പ്രസംഗം. 82-മത് ശിവഗിരി തീര്‍ത്ഥാടനത്തോടനുബന്ധിച്ച് നടക്കുന്ന ശ്രീനാരായണീയ യുവജന സംഗമം ഉദ്ഘാടനം ചെയ്യുകയായിരുന്നു അദ്ദേഹം.

കച്ചവട ലക്ഷ്യവുമായി ശ്രീനാരായണീയ പ്രസ്ഥാനത്തെ കാണുന്നവരുണ്ട്. സ്ഥാപിത താത്പര്യത്തോടെ ശ്രീനാരായണീയ ചിന്തകളെ തെറ്റായി അപഗ്രഥിക്കാന്‍ ശ്രമിച്ച വ്യക്തികളുമുണ്ട്. ശിവഗിരിയേക്കുറിച്ചുപോലും അപവാദ പ്രചാരണങ്ങളുണ്ടായി.

ആരോടും വ്യക്തിപരമായ ഒരു വിദ്വേഷവുമില്ലാതെയാണ് ഇത് പറയുന്നത്. മദ്യരാജാക്കന്മാരുടെ പണം കൊണ്ട് ശിവഗിരി മഠം നിര്‍മ്മിച്ചുവെന്ന വ്യാഖ്യാനം ശരിയല്ല. നിക്ഷിപ്ത താത്പര്യവുമായി ഗുരുനിന്ദ നടത്തരുതെന്നും അദ്ദേഹം പറഞ്ഞു.

ആസൂത്രണ കമ്മിഷണ്‍ ഇനി നീതി ആയോഗ്

ആസൂത്രണ കമ്മിഷന്റെ പേര് കേന്ദ്രസര്‍ക്കാര്‍ മാറ്റി. 'നീതി ആയോഗ്' എന്ന പേരിലായിരിക്കും കമ്മിഷണ്‍ ഇനി അറിയപ്പെടുക. ആസൂത്രണ കമ്മിഷന്‍ പുനഃസംഘടിപ്പിക്കുന്നതിനു മുന്നോടിയായാണ് പേരുമാറ്റം. കമ്മിഷന്‍ പുനഃസംഘടിപ്പിക്കുമെന്ന് സ്വാതന്ത്ര്യദിന സന്ദേശത്തില്‍ പ്രധാനമന്ത്രി നരേന്ദ്ര മോഡി സൂചന നല്‍കിയിരുന്നു. ഇതിനു മുന്നോടിയായി പ്രധാനമന്ത്രിയുടെ നേതൃത്വത്തില്‍ നിരവധി ചര്‍ച്ചകള്‍ ഇതിനകം നടന്നുകഴിഞ്ഞു. വിവിധ മേഖലകളില്‍ നിന്നുള്ള വിദഗ്ധരെ ഉള്‍പ്പെടുത്തിയാകും കമ്മിഷന്‍ പുനഃസംഘടിപ്പിക്കുക.

പികെയുടെ വഴിയേ; ഗോപാല ഗോപാലയ്ക്കും മതമൗലീകവാദികളുടെ പണി

മതവിശ്വാസങ്ങളിലെ പൊള്ളത്തരങ്ങള്‍ വരച്ചുകാട്ടിയ പികെയ്‌ക്ക് നേരെ യാഥാസ്‌ഥിതിക മതമൗലികവാദികളുടെ ആക്രമണം ഇതുവരെ അവസാനിച്ചിട്ടില്ല. ഏതാണ്ട്‌ ഈ സിനിമയുടെ പാതയിലൂടെയാണ്‌ തെലുങ്ക്‌ ചിത്രം ഗോപാല ഗോപാലയുടെ പോക്കും. ഈ സിനിമയ്‌ക്കെതിരേയും ഹിന്ദുസംഘടനകള്‍ രംഗത്ത്‌ വന്നു.

സിനിമ ഹിന്ദുക്കളുടെ മതവികാരം വ്രണപ്പെടുത്തുന്നതാണെന്ന്‌ ആരോപിച്ചുകൊണ്ട്‌ വിശ്വഹിന്ദു പരിക്ഷത്ത്‌, ഭാഗ്യനഗര്‍ ഗണേശ്‌ ഉത്സവ്‌ സമിതി തുടങ്ങിയ സംഘടനകളാണ്‌ രംഗത്ത്‌ വന്നിരിക്കുന്നത്‌. സിനിമയില്‍ വിവാദ സീനുകള്‍ ഉണ്ടെങ്കില്‍ അനുമതി നല്‍കരുതെന്ന്‌ സെന്‍സര്‍ബോര്‍ഡിനോട്‌ ഹിന്ദു സംഘടനകള്‍ ആവശ്യപ്പെട്ടു.

സിനിമയുടെ ടീസറില്‍ ഹിന്ദു വികാരം വ്രണപ്പെടുത്തുന്ന രംഗങ്ങള്‍ ഉണ്ടെന്നും ഹിന്ദു ദൈവങ്ങളെ മോശമാക്കി കാണിക്കുന്ന രംഗങ്ങള്‍ ഉണ്ടായിരുന്നതായി ഇവര്‍ പറഞ്ഞു. ബോളിവുഡ്‌ ചിത്രം ഓ മൈ ഗോഡിന്റെ തെലുങ്ക്‌ പതിപ്പാണ്‌ ഗോപാല ഗോപാല.

പവന്‍ കല്യാണും വെങ്കിടേഷുമാണ്‌ ചിത്രത്തില്‍ പ്രധാന വേഷത്തില്‍ എത്തുന്നത്‌. പബ്‌ളിസിറ്റിയുടെ ഭാഗമായി ഹിന്ദുദൈവങ്ങളെ മോശമായി ചിത്രീകരിക്കുന്നത്‌ അടുത്ത കാലത്ത്‌ ഇന്ത്യന്‍ സിനിമകളില്‍ ഏറിയിട്ടുണ്ടെന്നും പ്രതിഷേധക്കാര്‍ പറയുന്നു.

മതപരിവര്‍ത്തന നിരോധന നിയമം വേണം: രാജ്‌നാഥ് സിംഗ്

രാജ്യത്ത് മതപരിവര്‍ത്തന നിരോധന നിയമം നടപ്പാക്കണമെന്നാണ് തന്റെ അഭിപ്രായമെന്ന് കേന്ദ്ര ആഭ്യന്തരമന്ത്രി രാജ്‌നാഥ് സിംഗ്. ശിവഗിരിയില്‍ തിര്‍ഥാടന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

പ്രധാന രാഷ്ട്രീയ പാര്‍ട്ടികള്‍ ഇക്കാര്യം ഗൗരവമായെടുക്കണം. വേണമെങ്കില്‍ തുറന്ന ചര്‍ച്ചയുമാകാം. ഓരോ മതസ്ഥരും അതാത് മതങ്ങള്‍ അനുശാസിക്കുന്ന ദാര്‍ശനിക ചിന്തകള്‍ക്ക് അനുസരിച്ച് ജീവിക്കുന്നതാണ് ഏറ്റവും നല്ലത്. സമാധാനവും ശാന്തിയുമാണ് എല്ലാ മതങ്ങളുടെയും അടിസ്ഥാനതത്വം. മതവിശ്വാസികള്‍ മതതീതമായി ചിന്തിച്ച് സമത്വത്തോടെ കഴിയണമെന്ന നാരായണഗുരുസ്വാമിയുടെ പ്രഖ്യാപനം എല്ലാകാലത്തും പ്രസക്തമാണെന്നും അദ്ദേഹം പറഞ്ഞു.

ശിവഗിരി തീര്‍ത്ഥാടനത്തിന്റെ ഭാഗമായി നാളെ 10-ന് ആഗോള ശ്രീനാരായണീയ യുവജനസംഗമം കെ.പി.സി.സി പ്രസിഡന്റ് വി.എം.സുധീരനും 12.30-ന് മാധ്യമസെമിനാര്‍ മന്ത്രി ഷിബു ബേബിജോണും ഉദ്ഘാടനം ചെയ്യും. 2.30-ന് സാഹിത്യസമ്മേളനം 'മാതൃഭൂമി' മാനേജിങ് ഡയറക്ടര്‍ എം.പി.വീരേന്ദ്രകുമാര്‍ ഉദ്ഘാടനം ചെയ്യും. പ്രൊഫ.എം.കെ.സാനു ആധ്യക്ഷ്യം വഹിക്കും. അഞ്ചിന് മന്ത്രി എ.പി.അനില്‍കുമാറിന്റെ അധ്യക്ഷതയില്‍ നടക്കുന്ന സമാപന സമ്മേളനം കേന്ദ്രമന്ത്രി ഡോ.മഹേഷ് ശര്‍മ്മ ഉദ്ഘാടനം ചെയ്യും

മദ്യ നയത്തിലെ വിയോജിപ്പ്‌ തുടരുന്നുവെന്ന്‌ വി.എം സുധീരന്‍

മദ്യ നയത്തില്‍ തന്റെ വിയോജിപ്പ്‌ തുടരുന്നുവെന്ന്‌ കെ.പി.സി.സി പ്രസിഡന്റ്‌ വി.എം സുധീരന്‍. പ്രശ്‌ന പരിഹാരം ഉണ്ടായെന്ന്‌ മുഖ്യമന്ത്രി പറഞ്ഞത്‌ എന്ത്‌ അടിസ്‌ഥാനത്തിലാണെന്ന്‌ അറിയില്ല. ആറാം തീയതിയിലെ കെ.പി.സി.സി സര്‍ക്കാര്‍ ഏകോപന സമിതി പ്രശ്‌നം ചര്‍ച്ച ചെയ്യുമെന്നും സുധീരന്‍ വ്യക്‌തമാക്കി. മദ്യ നയത്തിലെ അഭിപ്രായ ഭിന്നത പരിഹരിച്ചെന്ന മുഖ്യമന്ത്രിയുടെ പ്രസ്‌ഥാവനയോട്‌ പ്രതികരിക്കുകയായിരുന്നു അദ്ദേഹം.<p> മദ്യ നയത്തില്‍ സര്‍ക്കാരും കെ.പി.സി.സിയും വിപരീത നിലപാട്‌ സ്വീകരിക്കുന്നതില്‍ പാര്‍ട്ടിയിലും പുറത്തും പ്രതിഷേധം ശക്‌തമാണ്‌. ഈ സാഹചര്യത്തിലാണ്‌ തന്റെ വിയോജിപ്പില്‍ ഉറച്ച്‌ നില്‍ക്കുന്നതായി സുധീരന്‍ വെളിപ്പെടുത്തിയത്‌. </p>

ശാരദ തട്ടിപ്പ്: മമതയെ അറസ്റ്റു ചെയ്താല്‍ ബംഗാള്‍ കത്തുമെന്ന് തൃണമൂല്‍ എം.പിയുടെ ഭീഷണി

ശാരദ തട്ടിപ്പ് കേസിം കേന്ദ്രത്തിനെ വെല്ലുവിളിച്ച് തൃണമൂല്‍ കോണ്‍ഗ്രസ് എം.പി ഇന്ദ്രീസ് അലി. കേസില്‍ പെടുത്തി മുഖ്യമന്ത്രി മമത ബാനര്‍ജിയെ അറസ്റ്റു ചെയ്താല്‍ ബംഗാള്‍ കത്തുമെന്നാണ് ഇന്ദ്രീസ് അലിയുടെ ഭീഷണി. കേസില്‍ പാര്‍ട്ടി എം.പി ശതാബ്ദി റോയിയെ സി.ബി.ഐ ചോദ്യം ചെയ്യലിന് വിളിപ്പിച്ചിരുന്നതായും റിപ്പോര്‍ട്ടുണ്ട്. സി.ബി.ഐ അന്വേഷണം നേതൃത്വത്തിലേക്ക് എത്തുന്നുവെന്ന സൂചനയാണ് നേതാക്കളെ വിറളിപിടിപ്പിക്കുന്നത്.

ഘർ വാപ്പസി എൻ.ഡി. എ യില്‍ അഭിപ്രായ ഭിന്നത

മതപരിവർത്തന പ്രവർത്തനങ്ങൾ എൻ.ഡി.എയെ ദോഷകരമായി ബാധിച്ചെന്ന് കേന്ദ്രമന്ത്രി രാം വിലാസ് പാസ്വാൻ. ഒരു മലയാളം ചാനലിന് നൽകിയ അഭിമുഖത്തിലാണ് എൻ.ഡി.എ മന്ത്രിസഭാംഗമായ പാസ്വാന്റെ പ്രതികരണം. വികസനം, അഴിമതിമുക്ത ഭരണം തുടങ്ങിയ അജണ്ടകളിൽ നിന്ന് സർക്കാർ വ്യതിചലിച്ചുവെന്നും ഇക്കാര്യത്തിൽ ഘടക കക്ഷികളുടെ അതൃപ്തി പരിഹരിക്കാൻ പ്രധാനമന്ത്രി ഇടപെടുമെന്നാണ് പ്രതീക്ഷയെന്നും പാസ്വാൻ പറഞ്ഞു.

ഇടുക്കി രൂപതാധ്യക്ഷനെ അധിക്ഷേപിച്ച്‌ യൂത്ത്‌ കോണ്‍ഗ്രസ്‌ നേതാവിന്റെ ഫെയ്‌സ്‌ബുക്ക്‌ പോസ്‌റ്റ്

ഇടുക്കി രൂപതാധ്യക്ഷന്‍ മാര്‍ മാത്യു ആനിക്കുഴിക്കാട്ടിലിനെ അധിക്ഷേപിച്ചുകൊണ്ടുള്ള യൂത്ത്‌ കോണ്‍ഗ്രസ്‌ നേതാവിന്റെ ഫേയ്‌സ്‌ബുക്ക്‌ പോസ്‌റ്റ്‌ വിവാദമാകുന്നു. കഴിഞ്ഞ 23 നാണ്‌ ഫ്രാന്‍സിസ്‌ മാര്‍പാപ്പയുടെ പരാമര്‍ശത്തെ അധികരിച്ച്‌ യൂത്ത്‌ കോണ്‍ഗ്രസ്‌ ആലക്കോട്‌ മണ്ഡലം പ്രസിഡന്റ്‌ ലിജോ ജോസ്‌ മഞ്ചപ്പള്ളി ബിഷപ്പിനെതിരെ പോസ്‌റ്റിട്ടത്‌. സഖാവ്‌ ആനിക്കുഴിക്കാട്ടിലിനെതിരേ ഫ്രാന്‍സിസ്‌ മാര്‍പാപ്പഎന്നു പറഞ്ഞാണ്‌ പോസ്‌റ്റ്‌ ആരംഭിക്കുന്നത്‌. സഭയിലെ ചിലര്‍ക്ക്‌ അധികാരക്കൊതിയും ആത്മീയ മറവിരോഗവുമാണെന്ന്‌ കഴിഞ്ഞ ദിവസം ഫ്രാന്‍സിസ്‌ മാര്‍പാപ്പ പറഞ്ഞിരുന്നു. ഇതുമായി ബന്ധപ്പെടുത്തിയാണ്‌ ലിജോയുടെ പോസ്‌റ്റ്‌. ബിഷപ്പിന്റെ അധികാരമോഹം മാര്‍പാപ്പ അറിഞ്ഞുകാണുമെന്നും വലിയ ഇടയനായ യേശുവിന്റെ ആടുകളെ നോക്കാന്‍ ഏല്‍പ്പിച്ച കൊച്ചിടയനാണ്‌ ആനിക്കുഴിയെന്നും ആ അവസരം മുതലാക്കി തന്റെ തൊഴുത്തിലെ ആടുകളെ ഇറച്ചിവിലയ്‌ക്ക്‌ വിറ്റ ഇടയനാണ്‌ ബിഷപ്പെന്നുമാണു പോസ്‌റ്റ്‌. ലിജോയ്‌ക്കെതിരേ യൂത്ത്‌ കോണ്‍ഗ്രസിലെ ഒരു വിഭാഗം രംഗത്തെത്തിക്കഴിഞ്ഞു. കെ.പി.സി.സി. പ്രസിഡന്റ്‌, യൂത്ത്‌ കോണ്‍ഗ്രസ്‌ സംസ്‌ഥാന പ്രസിഡന്റ്‌, ഇടുക്കി പാര്‍ലമെന്റ്‌ മണ്ഡലം പ്രസിഡന്റ്‌ എന്നിവര്‍ക്ക്‌ യൂത്ത്‌ കോണ്‍ഗ്രസ്‌ കാമാക്ഷി ബൂത്ത്‌ പ്രസിഡന്റും കാല്‍വരിമൗണ്ട്‌ ഇടവകാംഗവുമായ ജിബു പി.സി. പരാതി നല്‍കി.

വിമാനദുരന്തം: 40 മൃതദേഹം കണ്ടെത്തി

കാണാതായ എയര്‍ ഏഷ്യ വിമാനത്തിലുണ്ടായിരുന്ന 40 പേരുടെ മൃതദേഹവും തകര്‍ന്ന വിമാനത്തിന്റെ അവശിഷ്ടങ്ങളും കണ്ടെത്തി. ചൊവ്വാഴ്ച നടത്തിയ തെരച്ചിലില്‍ ജാവ കടലില്‍ ഇന്തോനേഷ്യയുടെ ഭാഗമായ ബോര്‍ണിയോ ദ്വീപിനു സമീപമാണ് മൃതദേഹങ്ങള്‍ കണ്ടതെന്ന് ഇന്തോനേഷ്യന്‍ നാവികസേന അറിയിച്ചു. എയര്‍ ഏഷ്യയുടെ ക്യുസെഡ് 8501 വിമാനത്തില്‍ ഉണ്ടായിരുന്നവരുടെ മൃതദേഹങ്ങള്‍ തന്നെയാണ് ഇവയെന്ന് ഇന്തോനേഷ്യന്‍ ഗവണ്‍മെന്റ് സ്ഥിരീകരിച്ചു. തെരച്ചില്‍ തുടരുന്നു.

വിമാനാവശിഷ്ടങ്ങളും മൃതദേഹങ്ങളും കടലില്‍ ഒഴുകിനടക്കുന്നനിലയിലായിരുന്നു. തെരച്ചില്‍ സംഘത്തലവന്‍ ബംബാങ് സൊലിസ്ത്യോയുടെ വാര്‍ത്താസമ്മേളനത്തില്‍ ഇന്തോനേഷ്യന്‍ ടിവി ഈ ദൃശ്യങ്ങള്‍ സംപ്രേഷണം ചെയ്തു. അപകടത്തില്‍പ്പെട്ട പലരുടെയും ബന്ധുക്കള്‍ ദൃശ്യങ്ങള്‍ കണ്ട് അലമുറയിട്ടു. ചിലര്‍ ബോധരഹിതരായി. യാത്രക്കാര്‍ക്കുള്ള വാതിലും ചരക്ക് കയറ്റുന്ന വാതിലുമാണ് ഒഴുകുന്നതായി കണ്ടെത്തിയതെന്ന് സിവില്‍ ഏവിയേഷന്‍ തലവന്‍ ജോകോ മുര്‍ജത്മോജോ പറഞ്ഞു. യാത്രയ്ക്കിടെ വിമാനവുമായി ബന്ധം നഷ്ടപ്പെട്ട മേഖലയുടെ 10 കിലോമീറ്റര്‍ ചുറ്റളവിലായിരുന്നു തെരച്ചില്‍. അവശിഷ്ടം കണ്ടെത്തിയതിനെ തുടര്‍ന്ന് നടത്തിയ തെരച്ചിലിലാണ് മൃതദേഹങ്ങള്‍ കണ്ടെടുത്തത്. വിമാനത്തിന്റെ പ്രധാന ഭാഗങ്ങള്‍ കടലിനടിയില്‍ ഉണ്ടോയെന്ന് പരിശോധിക്കാന്‍ അത്യാധുനിക സൗകര്യങ്ങളുള്ള കപ്പലുകള്‍ പ്രദേശത്ത് വിന്യസിച്ചിട്ടുണ്ടെന്ന് മുര്‍ജത്മോജോ പറഞ്ഞു. സിംഗപ്പൂര്‍, ഇന്തോനേഷ്യ, ഓസ്ട്രേലിയ എന്നീ രാജ്യങ്ങള്‍ സംയുക്തമായാണ് തെരച്ചില്‍ നടത്തുന്നത്. 30 കപ്പലും 15 വിമാനവും ഏഴ് ഹെലികോപ്റ്ററും തെരച്ചിലില്‍ പങ്കെടുക്കുന്നു.ഇന്തോനേഷ്യയിലെ സുരബായ വിമാനത്താവളത്തില്‍നിന്ന് സിംഗപ്പൂരിലേക്കുള്ള യാത്രയ്ക്കിടെയാണ് എയര്‍ ഏഷ്യയുടെ എ320-200 എയര്‍ബസ് ജാവ കടലില്‍ തകര്‍ന്നുവീണത്.

കറിക്ക് അരിയാൻ സമയം തീരെയില്ലേ?വെജിറ്റബിൾ ആൻഡ് ഫ്രൂട്ട്‌സ് പ്രോമോഷൻ കൗൺസിൽ അരിഞ്ഞു വീട്ടിലെത്തിക്കും

ഇടുക്കി: തിരക്കുപിടിച്ച ജീവിതത്തിനിടയിൽ പച്ചക്കറി വാങ്ങാനും അരിയാനും കഴുകാനും സമയം കിട്ടുന്നില്ലെന്ന പരാതി ഇനി വേണ്ട. സാമ്പാർ, അവിയൽ, കുറുമ.. കറി ഏതുമാകട്ടെ. ഫോണിൽ ഒന്ന് വിളിച്ച് പറഞ്ഞാൽ മതി. ആവശ്യമായ പച്ചക്കറിക്കൂട്ടുകൾ അരി‌ഞ്ഞ് കവറിലാക്കി എത്തിക്കും.

സർക്കാർ സംരംഭമായ വെജിറ്റബിൾ ആൻഡ് ഫ്രൂട്ട്‌സ് പ്രോമോഷൻ കൗൺസിൽ കേരളയുടെ നേതൃത്വത്തിൽ തിരുവനന്തപുരം, എറണാകുളം ജില്ലകളിലാണ് പദ്ധതി പരീക്ഷണാടിസ്ഥാനത്തിൽ ആരംഭിച്ചത്. തിരുവനന്തപുരം ജില്ലയിൽ അരക്കോടി രൂപയുടെ പദ്ധതിയാണ് പൂർത്തിയാകുന്നത്. ജനുവരിയോടെ മുഴുവൻ ജില്ലകളിലും പദ്ധതി വിപുലപ്പെടുത്താനാണ് തീരുമാനം.

കർഷകരിൽനിന്ന് ആവശ്യാനുസരണം പച്ചക്കറി വി.എഫ്.പി.സി.കെ യുടെ കേന്ദ്രത്തിലെത്തിച്ച് അരിഞ്ഞ് പായ്ക്കറ്റുകളാക്കി ഓർഡർ നൽകുന്നവർക്ക് എത്തിച്ച് നൽകുന്നതാണ് പദ്ധതി. സർക്കാർ ഉദ്യോഗസ്ഥരുടെ ക്വാർട്ടേഴ്സുകൾ, റസിഡന്റ്സ് അസോസിയേഷനുകൾ തുടങ്ങി ഏതൊരാൾക്കും പച്ചക്കറി ലഭിക്കും. അത്യാധുനിക യന്ത്രസഹായത്തോടെയാണ് പച്ചക്കറികൾ അരി‌ഞ്ഞെടുക്കുക.

പച്ചക്കറി വരുന്ന വഴി പച്ചക്കറിക്കുള്ള ഓർഡർ ഒരു ദിവസം മുമ്പേ വി.എഫ്.പി.സിയുടെ ഫോണിൽ അറിയിക്കണം. നാടൻ പച്ചക്കറി കർഷകരിൽനിന്ന് സംഭരിക്കും. രാവിലെ സംഭരിച്ചവ അരമണിക്കൂർ നേരം കീടനാശിനിമുക്തമാക്കാൻ ഓർഗാനിക്ക് സൊലൂഷനിൽ ഇട്ടുവയ്ക്കും. പിന്നീട് അരിഞ്ഞ് കവറുകളിലാക്കി ഉച്ചയ്ക്കുശേഷം ആവശ്യക്കാർക്ക് എത്തിക്കും. സാമ്പാർ, അവിയൽ, കുറുമ തുടങ്ങി ചാറ് കറികൾക്കുള്ള ഒരു പായ്ക്കറ്റിന് 400 ഗ്രാമാണ് തൂക്കം. തോരൻ (ഉപ്പേരി) കറികൾക്കുള്ള പായ്ക്കറ്റിന് 300 ഗ്രാം തൂക്കം. കറി ഏതായാലും 25 രൂപയാണ് ഒരു പായ്ക്കറ്റിന്റെ വില. 100 തരം കറികൂട്ടുകൾക്കുള്ള പച്ചക്കറികൾ അരി‌ഞ്ഞ് നൽകുകയാണ് ലക്ഷ്യം.

സുരക്ഷിതമായി കഴിക്കാം വിഷവിമുക്തമായ നാടൻ പച്ചക്കറികൾ അരിഞ്ഞ് പായ്ക്ക് ചെയ്ത് സുരക്ഷിതമായി കഴിക്കാവുന്ന വിധത്തിൽ എത്തിക്കുകയാണ് പദ്ധതിയുടെ ലക്ഷ്യമെന്ന് വി.എഫ്.പി.സി.കെ തിരുവനന്തപുരം ജില്ലാ മാനേജർ അനിൽകുമാർ 'കേരളകൗമുദി" യോട് പറഞ്ഞു. ഇപ്പോൾ 800 മുതൽ 1000 വരെ പായ്ക്കറ്റുകളാണ് പ്രതിദിനം വിപണനം ചെയ്യുന്നത്. പദ്ധതിക്ക് വൻ പ്രിയമാണ് ലഭിക്കുന്നത്. അടുത്ത മാസം ഉദ്ഘാടനത്തോടെ 5,000 മുതൽ 10,000 പായ്ക്കറ്റുകൾ വിതരണം ചെയ്യാമെന്നാണ് പ്രതീക്ഷയെന്നും അദ്ദേഹം പറഞ്ഞു.