‘പികെ’യുടെ സാമ്പത്തിക ഉറവിടം ദുബായും പാക് ചാരസംഘടനയുമെന്ന് സുബ്രഹ്മണ്യന്‍ സ്വാമി

മുംബൈ: മതവിമര്‍ശനം നടത്തുന്നുവെന്ന് ആരോപിച്ച് സംഘ്പരിവാര്‍ സംഘടനകള്‍ അമീര്‍ഖാന്‍ നായകനായ ‘പികെ’ യ്ക്കെതിരെ പലയിടങ്ങളിലും ആക്രമണമഴിച്ചുവിടുന്നതിനിടെ ചിത്രത്തിന്റെ സാമ്പത്തിക ഉറവിടത്തെ ചോദ്യം ചെയ്ത് ബി.ജെ.പി നേതാവ് സുബ്രഹ്മണ്യന്‍ സ്വാമി രംഗത്ത്. ട്വിറ്റര്‍ വഴിയാണ് രാജ്കുമാര്‍ ഹിരാണി സംവിധാനംചെയ്ത 'പികെ'യ്ക്ക് ദുബായില്‍നിന്നും പാക് ചാരസംഘടനയായ ഐ.എസ്.ഐയില്‍നിന്നും പണം ലഭിച്ചതായി സ്വാമി ആരോപണമുന്നയിച്ചിരിക്കുന്നത്. ആരാണ് ‘പികെ’യ്ക്കുവേണ്ടി പണം മുടക്കിയത്? എനിക്കു കിട്ടിയ വിവരം അനുസരിച്ച് ഇത് ദുബായില്‍ നിന്നും ഐ.എസ്.ഐയില്‍ നിന്നുമാണ്. ഡയറക്ടറേറ്റ് ഓഫ് റവന്യൂ ഇന്റലിജന്‍സ് ഇതിനെക്കുറിച്ച് അന്വേഷിക്കണം. - സുബ്രഹ്മണ്യന്‍ സ്വാമിയുടെ ട്വീറ്റില്‍ പറയുന്നു. 'പികെ'യ്ക്കെതിരെ നിരവിധി പോസ്റ്റുകള്‍ ബി.ജെ.പി നേതാവ് ട്വിറ്റര്‍വഴി പ്രസിദ്ധപ്പെടുത്തിയിട്ടുണ്ട്. തീവ്രവാദ പണം വെളുപ്പിക്കുകയാണ് 'പി.കെ'യെന്ന് മറ്റൊരു ട്വീറ്റില്‍ അദ്ദേഹം ആരോപിക്കുന്നു. ചിത്രം റിലീസ് ചെയ്തതിനു പിറകെ ഇതു നിരോധിക്കണമെന്നാവശ്യപ്പെട്ട് സംഘപരിവാര്‍ സംഘടനകള്‍ രംഗത്തെത്തിയിരുന്നു. ഈ ആവശ്യവുമായി കോടതിയെ സമീപിച്ചിരുന്നെങ്കിലും കോടതി ഹരജി പരിഗണിക്കാന്‍ വിസമതിക്കുകയായിരുന്നു. മതത്തെ പരിഹസിക്കുന്നുവെന്ന് ആരോപിച്ച് മുംബൈ, അഹമ്മദാബാദ്, ഭോപ്പാല്‍ എന്നിവിടങ്ങളില്‍ ചിത്രം പ്രദര്‍ശിപ്പിച്ച തിയ്യേറ്ററുകള്‍ക്കുനേരെ സംഘപരിവാര്‍ സംഘടനകള്‍ കഴിഞ്ഞദിവസങ്ങളില്‍ ആക്രമണം നടത്തിയിരുന്നു.

വ്യാജ ഏറ്റുമുട്ടല്‍: അമിത് ഷായ്ക്കെതിരായ കേസ് സി.ബി.ഐ കോടതി റദ്ദാക്കി

മുംബൈ: സുഹ്‌റാബുദ്ദീന്‍ ശെയ്ഖ് വ്യാജ ഏറ്റുമുട്ടല്‍ കേസില്‍ ബി.ജെ.പി അദ്ധ്യക്ഷന്‍ അമിത്ഷായ്‌ക്കെതിരായ കേസ് മുംബൈ സി.ബി.ഐ കോടതി റദ്ദാക്കി. രാഷ്ട്രീയ ലക്ഷ്യത്തോടെയാണ് തന്നെ കേസില്‍ ഉള്‍പ്പെടുത്തിയതെന്നും ഏറ്റുമുട്ടില്‍ പങ്കില്ലെന്നും കാണിച്ച് ഈ വര്‍ഷം ആദ്യത്തില്‍ അമിത്ഷാ അപ്പീല്‍ നല്‍കിയിരുന്നു. ഈ അപ്പീലിലണ് ഇപ്പോള്‍ വിധിയുണ്ടായിരിക്കുന്നത്. സുഹ് റാബുദ്ദീനെയും ഭാര്യയെയും വ്യാജ ഏറ്റുമുട്ടലില്‍ കൊലപ്പെടുത്തുന്നതിന് ദൃക്‌സാക്ഷിയായ തുളസി റാം പ്രജാപതിയെയും ഗുജറാത്ത് പൊലിസ് മറ്റൊരു ഏറ്റുമുട്ടലിലൂടെ വധിച്ചിരുന്നു. 2006ലായിരുന്നു സംഭവങ്ങള്‍. ഈ കേസില്‍ അന്ന് ഗുജറാത്ത് മന്ത്രിയായിരുന്ന അമിത് ഷാ ഉള്‍പ്പെടെ 19 പേര്‍ക്കെതിരെ 2013ല്‍ സി.ബി.ഐ കുറ്റപത്രം നല്‍കിയിരുന്നു. കേസിലെ മിക്ക പ്രതികളും ഉന്നത പൊലിസ് ഓഫിസര്‍മാരാണ്. ഗുജറാത്തില്‍ നിക്ഷ്പക്ഷ അന്വേഷണം നടക്കില്ലെന്ന വാദിഭാഗത്തിന്റെ ആശങ്ക കണക്കിലെടുത്ത് മുംബൈയിലേക്ക് ഈ വര്‍ഷം തുടക്കത്തിലാണ് കേസ് മാറ്റിയത്.

ഡല്‍ഹിയില്‍ അതി ശൈത്യം തുടരുന്നു

ന്യൂഡല്‍ഹി: തലസ്ഥാന നഗരിയില്‍ ഡിസംബറിലെ ശൈത്യം കനക്കുന്നു. മൂടല്‍മഞ്ഞുകാരണം ഡല്‍ഹിയില്‍ വിമാന, ട്രെയിന്‍, റോഡ് ഗതാഗതങ്ങള്‍ താറുമാറായി. ഇന്ന് 16 വിമാനങ്ങളാണ് റദ്ദാക്കിയത്. 64 വിമാനങ്ങള്‍ വൈകിയതായും അധികൃതര്‍ അറിയിച്ചു. 100-ല്‍ അധികം ട്രെയിനുകള്‍ വൈകിയോടുകയാണ്. ഡല്‍ഹിയില്‍ കഴിഞ്ഞ ഇവസം രാവിലെ 4.5 ഡിഗ്രി സെല്‍ഷ്യസാണ് താപനില രേഖപ്പെടുത്തിയത്.

കഴിഞ്ഞ അരദശകത്തിനകം ഏറ്റവും കുറഞ്ഞ താപനിലയാണ് ഞായറാഴ്ച രേഖപ്പെടുത്തിയത്. 2.6 ഡിഗ്രിയോളമെത്തിയിരുന്നു അന്ന്.

ഇന്റർനെറ്റ് കോളുകൾക്ക് അധിക ചാർജ് ഈടാക്കാനുള്ള തീരുമാനം എയർടെൽ പിൻവലിച്ചു

ന്യൂഡൽഹി: വോയ്‌സ് ഓവർ ഇന്റർനെറ്റ് പ്രോട്ടോകോൾ കണക്ടിവിറ്റിക്ക് അധിക ചാർജ്ജ് ഈടാക്കാനുള്ള തീരുമാനത്തിൽ നിന്നും എയർടെൽ പിൻമാറി. സ്‌കൈപ്, വൈബർ, ലൈൻ തുടങ്ങിയ വോയസ് കോളുകൾ അനുവദിക്കുന്ന ആപുകളുടെ ഉപയോഗത്തിന് പ്രത്യേകം ചാർജ് നൽകേണ്ടി വരുമെന്നാണ് കമ്പനി അറിയിച്ചിരുന്നത്. സമ്മർദ്ദത്തെ തുടർന്നാണ് ചാർജ്ജ് ഈടാക്കാനുള്ള നീക്കത്തിൽ നിന്നും എയർടെൽ പിൻമാറുന്നത്. 2ജി, 3ജി പ്ലാനുകൾ ഉപയോഗിച്ചുള്ള കോളുകൾക്ക് അധിക ചാർജ് ഈടാക്കുമെന്ന് അടുത്തിടെയാണ് എയർടെൽ അറിയിച്ചത്. 2ജി നെറ്റ്‌വർക്കിൽ ഒരു ജി.ബി. ഉപയോഗത്തിന് 10,000 രൂപയും 3ജിയിൽ 4,000 രൂപയുമാണ് അധികമായി ഈടാക്കാനിരുന്നത്. ഇന്റർനെറ്റിന് പണം വാങ്ങുന്നതിനാൽ ഇത്തരം കോളുകൾക്ക് പ്രത്യേകം ചാർജ് ഈടാക്കുന്നത് നിയമവിരുദ്ധമാണെന്നാണ് ഈ രംഗത്തുള്ള വിദഗ്ദ്ധരുടെ അഭിപ്രായം. കമ്പനിയുടെ തീരുമാനത്തിനെതിരെ ഓൺലൈനിലും വൻ പ്രതിഷേധം ഉയർന്നിരുന്നു.

ബെംഗളൂരു സ്ഫോടനം ഭീകരാക്രമണമെന്ന് സ്ഥിരീകരണം

ബെംഗളൂരു സ്ഫോടനം ഭീകരാക്രമണമെന്ന് കേന്ദ്ര ആഭ്യന്തര സഹമന്ത്രി കിരണ്‍ റിജ്ജു. സ്ഫോടനത്തിന് പിന്നില്‍ നിരോധിത സംഘടനയായ സിമിയുടെ പങ്ക് അന്വേഷിച്ചു വരികയാണ്. കര്‍ണാടക സര്‍ക്കാരിന് എല്ലാ സഹായവും നല്‍കുമെന്ന് കിരണ്‍ റിജ്ജു അറിയിച്ചു. ആഭ്യന്തരമന്ത്രി രാജ്നാഥ് സിങ്ങിന്‍റെ നേതൃത്വത്തില്‍ ഡല്‍ഹിയില്‍ ഉന്നതതലയോഗം വിളിച്ചിട്ടുണ്ട്.

ആഭ്യന്തരസെക്രട്ടറി, ഐ.ബി ഉന്നതഉദ്യോഗസ്ഥര്‍ തുടങ്ങിയവര്‍ പങ്കെടുക്കും. അന്വേഷണത്തിനായി രണ്ട് എന്‍.ഐ.എ സംഘങ്ങള്‍ ബെംഗളൂരുവിലെത്തി. എന്നാല്‍ അന്വേഷണം പൂര്‍ണമായും എന്‍.ഐ.എ ഏറ്റെടുത്തിട്ടില്ല. സംശയിക്കുന്ന ആറു പേര്‍ക്കെതിരെ ലുക്ക് ഔട്ട് നോട്ടിസ് പുറപ്പെടുവിച്ചിട്ടുണ്ട്. കര്‍ണാടക മുഖ്യമന്ത്രി സിദ്ധരാമയ്യ വിളിച്ചുചേര്‍ത്ത ഉന്നതഉദ്യോഗസ്ഥരുടെ യോഗവും ഇന്ന് ചേരും. സ്ഫോടനത്തില്‍ കൊല്ലപ്പെട്ട സ്ത്രീയുടെ കുടുംബത്തിന് അഞ്ചു ലക്ഷം രൂപ നഷ്ടപരിഹാരം നല്‍കും. ജനങ്ങള്‍പരിഭ്രാന്തരാകേണ്ടതില്ലെന്നും സര്‍ക്കാര്‍ ജനങ്ങളുടെ സുരക്ഷയ്ക്കായുള്ള എല്ലാ മുന്‍കരുതലുകളും സ്വീകരിച്ചിട്ടുണ്ടെന്നും സംഭവസ്ഥലം സന്ദര്‍ശിച്ച ശേഷം അദ്ദേഹം പറഞ്ഞു. ഇന്നലെ രാത്രി എട്ടരയ്ക്ക് ചര്‍ച്ച് സ്ട്രീറ്റിലുണ്ടായ സ്ഫോടനത്തില്‍ ഒരു സ്ത്രീ കൊല്ലപ്പെടുകയും മൂന്നുപേര്‍ക്ക് പരുക്കേല്‍ക്കുകയും ചെയ്തിരുന്നു. ഡല്‍ഹിയും മുംബൈയും അടക്കമുളള രാജ്യത്തെ പ്രധാനനഗരങ്ങളിലും കേന്ദ്ര ആഭ്യന്തരമന്ത്രാലയം ജാഗ്രതാനിര്‍ദേശം നല്‍കിയിട്ടുണ്ട്.

ചര്‍ച്ച് സ്ട്രീറ്റിലെ കോക്കനട്ട് ഗ്രൗവ് റസ്റ്റോറന്‍റിന്‍റെ ഗേറ്റിനുസമീപമായിരുന്നു സ്ഫോടനം. ചെന്നൈ സ്വദേശി ഭവാനിയാണ് മരിച്ചത്. സ്ഫോടനത്തില്‍ തലയ്ക്ക് ഗുരുതരമായി പരുക്കേറ്റ ഭവാനിയെ ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല. പരുക്കേറ്റ ചെന്നൈ സ്വദേശി കാര്‍ത്തിക്കിന്‍റെ നില ഗുരുതരമല്ല. ചര്‍ച്ച് സട്രീറ്റിന് പിന്നാലെ മറ്റിടങ്ങളിലും സ്ഫോടനം നടന്നതായി സാമൂഹികമാധ്യമങ്ങളില്‍ പ്രചരിച്ചത് ആശങ്കയുണ്ടാക്കി. പുതുവല്‍സരാഘോഷങ്ങള്‍ സജീവമായ സാഹചര്യത്തില്‍ ഭീതിപരത്താന്‍ ലക്ഷ്യമിട്ട് നടത്തിയ സ്ഫോടനമാണിതെന്നാണ് പൊലീസ് നിഗമനം.

തണുത്തു വിറച്ച് ഡല്‍ഹി

രാജ്യതലസ്ഥാനം കൊടുംശൈത്യത്തില്‍ വിറയ്ക്കുന്നു. ഈ തണുപ്പുകാലത്തെ ഏറ്റവും കുറഞ്ഞ താപനില ഞായറാഴ്ച അനുഭവപ്പെട്ടു. 2.6 ഡിഗ്രി സെല്‍ഷ്യസാണ് ഞായറാഴ്ച രാവിലെ ഡല്‍ഹിയിലെ താപനില. തണുപ്പും മൂടല്‍മഞ്ഞും കനത്തതോടെ ഉത്തരേന്ത്യയില്‍ വ്യോമ- ട്രെയിന്‍ ഗതാഗതം താറുമാറായി.രാവിലെ എട്ടരയ്ക്കാണ്് താപനില ഈ വര്‍ഷത്തെ ഏറ്റവും താഴ്ന്നനിലയില്‍ എത്തിയത്. അന്തരീക്ഷ ഈര്‍പ്പം 97 ശതമാനമായി ഉയര്‍ന്നു. മൂടല്‍മഞ്ഞ് കനത്തതോടെ ദൃഷ്ടിദൂരം 50 മീറ്ററില്‍ താഴെയായി. ഉച്ചയോടെ ഉയര്‍ന്ന താപനില 19.2 ഡിഗ്രി സെല്‍ഷ്യസ്വരെ എത്തിയെങ്കിലും വൈകിട്ട് വീണ്ടും താഴ്ന്നു. ശനിയാഴ്ച 4.8 ആയിരുന്നു കുറഞ്ഞ താപനില. വരുംദിവസങ്ങളിലും ഈനില തുടര്‍ന്നേക്കുമെന്നാണ് കാലാവസ്ഥ നിരീക്ഷണകേന്ദ്രങ്ങള്‍ നല്‍കുന്ന സൂചന.

1.1 ഡിഗ്രിയാണ് ഡല്‍ഹിയില്‍ രേഖപ്പെടുത്തിയ റെക്കോഡ് തണുപ്പ്. 1945ലായിരുന്നു ഇത്. തണുപ്പ് കനത്തത് വ്യോമഗതാഗതത്തെ ബാധിച്ചു. ഡല്‍ഹിയില്‍നിന്നും തിരിച്ചുമുള്ള 55 സര്‍വീസ് മൂടല്‍മഞ്ഞിനെതുടര്‍ന്ന് വൈകി. മൂന്ന് അന്താരാഷ്ട്ര വിമാനങ്ങള്‍ വഴിതിരിച്ചുവിട്ടു. വടക്കുകിഴക്കന്‍ സംസ്ഥാനങ്ങളില്‍നിന്നുള്ള നാല് ട്രെയിന്‍ റദ്ദാക്കി.70 ട്രെയിന്‍ വൈകിയോടി.

16 മന്ത്രിമാർക്ക് ഭീഷണി ഇമെയിൽ; യുവാവ് അറസ്റ്റിൽ

റിപ്പബ്ലിക് ദിനത്തിൽ ഭീകരാക്രമണം നടത്തുമെന്ന ഇമെയിൽ സന്ദേശം അയച്ച സംഭവത്തിൽ യുവാവ് അറസ്റ്റിൽ. ജയ്പ്പൂർ സ്വദേശിയായ സുഷിൽ ചൗധരിയെന്ന 34-കാരനെയാണ് രാജസ്ഥാൻ ഭീകരവിരുദ്ധ സേന അറസ്റ്റ് ചെയ്തത്.

വിദ്യാനഗറിലെ ഇന്റർനെറ്റ് കഫേയിൽ നിന്നാണ് ഇയാൾ ഭീഷണി സന്ദേശം അയച്ചതെന്ന് ഗൂഗിളിന്റെ സഹായത്തോടെ അന്വേഷണ സംഘം കണ്ടെത്തി. തുടർന്ന് മണിക്കൂറുകൾക്കുള്ളിൽ മുർളിപുരയിലെ വീട്ടിൽ നിന്നാണ് ഇയാളെ അറസ്റ്റ് ചെയ്തതെന്ന് ഭീകരവിരുദ്ധ സേന ഡയറക്ടർ ജനറൽ അലോക് ത്രിപേദി പറഞ്ഞു. പരിഭ്രാന്തി സൃഷ്ടിക്കലായിരുന്നു ഇയാളുടെ ലക്ഷ്യമെന്നാണ് പ്രാഥമിക നിഗമനമെന്ന് പോലീസിനോട് അടുത്ത വൃത്തങ്ങൾ സൂചിപ്പിച്ചു.

കഴിഞ്ഞ ദിവസമാണ് ഭീകരാക്രമണം നടത്തുമെന്ന പറഞ്ഞ് കൊണ്ടുള്ള ഇമെയിൽ രാജസ്ഥാനിലെ 16 മന്ത്രിമാർക്ക് ഇയാൾ അയച്ചത്. ലിയോണസർദ എന്ന മെയിൽ ഐഡിയിൽ നിന്നാണ് ഇമെയിൽ അയച്ചിരുന്നത്. ”ഞങ്ങൾ വലിയൊരു സർപ്രൈസ് നൽകാനുള്ള തയ്യാറെടുപ്പിലാണ്. ഒരുങ്ങിയിരുന്നോളൂ. ജനുവരി 26-ന് രാജസ്ഥാനിൽ പലയിടങ്ങളിലും സ്‌ഫോടനങ്ങളുണ്ടാകും. ഇന്ത്യൻ മുജാഹിദീൻ” എന്നായിരുന്നു സന്ദേശം.

താനെയില്‍ തടി മില്ലില്‍ തീ പിടുത്തം; എട്ടു മരണം

താനെ: താനെയില്‍ തടി ഉരിപ്പടികള്‍ സൂക്ഷിച്ചിരുന്ന കെട്ടിടത്തിലുണ്ടായ അഗ്നിബാധയെ തുടര്‍ന്ന് എട്ടു പേര്‍ മരിച്ചു. ഇന്നു പുലര്‍ച്ചെ ബിവാന്‍ഡി ടൌണിലാണ് വന്‍തീപിടുത്തമുണ്ടായത്. അപകടത്തില്‍ മൂന്നു പേര്‍ക്ക് ഗുരുതരമായി പരിക്കേറ്റിട്ടുണ്ട്. മരിച്ചവരെല്ലാം നേപ്പാള്‍ സ്വദേശികളാണ്. നാലുമണിക്കൂര്‍ നീണ്ട പരിശ്രമത്തിനൊടുവില്‍, രാവിലെയാണ് തീ അണയ്ക്കാന്‍ കഴിഞ്ഞതെന്ന് ഫയര്‍ഫോഴ്സ് ഉദ്യോഗസ്തര്‍ അറിയിച്ചു. എന്നാല്‍ തീ പിടുത്തത്തിന്റെ കാരണം അറിവായിട്ടില്ല.

മന്ത്രിമാര്‍ക്ക് ഇന്ത്യന്‍ മുജാഹിദ്ദീന്റെ ഭീഷണി സന്ദേശം

ജയ്പൂര്‍ : രാജസ്ഥാനിലെ പതിനാറോളം മന്ത്രിമാര്‍ക്ക് ഇന്ത്യന്‍ മുജാഹിദ്ദീന്റെ ഭീഷണി സന്ദേശം . ആഭ്യന്തരമന്ത്രി ഗുലാബ് ചന്ദ് കതാരിയ, സാമൂഹ്യക്ഷേമ വകുപ്പ് മന്ത്രി അരുണ്‍ ചതുര്‍വേദി തുടങ്ങിയവര്‍ക്കടക്കമാണ് ഔദ്യോഗിക ഇമെയില്‍ വിലാസത്തിലേക്ക് ഭീഷണി സന്ദേശം വന്നത് . ” ഞങ്ങള്‍ എന്തുചെയ്യും എന്ന് നിങ്ങള്‍തന്നെ മനസിലാക്കിക്കൊള്ളുക” എന്ന സന്ദേശമാണ് മന്ത്രിമാര്‍ക്ക് ലഭിച്ചത് . ഇതിന്റെ ഉറവിടത്തെക്കുറിച്ചും വിശ്വാസ്യതയെക്കുറിച്ചും അന്വേഷിച്ചു വരികയാണെന്ന് രാജസ്ഥാന്‍ ഡിജിപി ഒമേന്ദ്ര ഭരദ്വാജ് പറഞ്ഞു . ഇന്ത്യന്‍ മുജാഹിദ്ദീന്റെ ഭീഷണിയെത്തുടര്‍ന്ന് മന്ത്രിമാരുടെ സുരക്ഷ വര്‍ദ്ധിപ്പിച്ചിട്ടുണ്ട് .

സൂര്യാ ടിവി ജീവനക്കാരിയെ പീഡിപ്പിച്ച കേസിൽ സൺ ടിവി സി.ഒ.ഒ അറസ്റ്റിൽ

ചെന്നൈ: മുൻ ജീവനക്കാരിയെ ലൈംഗീകമായി പീഡിപ്പിച്ച സംഭവത്തിൽ സൺ ടിവി സി.ഒ.ഒയെ പോലീസ് അറസ്റ്റ് ചെയ്തു. ചീഫ് ഓപ്പറേറ്റിംഗ് ഓഫീസർ സി. പ്രവീണിനെയാണ് പോലീസ് ഇന്ന് രാവിലെ അറസ്റ്റ് ചെയ്തത്. സൺനെറ്റ് വർക്കിന് കീഴിലുള്ള സൂര്യടിവിയിലെ ജോലിയിൽ നിന്നും രാജിവെച്ച് അഞ്ച് മാസത്തിന് പരാതിയുമായി യുവതി രംഗത്തെത്തിയത്. പ്രാഥമിക അന്വേഷണത്തിൽ യുവതി ശാരീരികമായും മാനസികമായും പീഡിപ്പിക്കപ്പെട്ടിട്ടുണ്ടെന്ന് കണ്ടെത്തിയതിനെ തുടർന്നാണ് അറസ്റ്റ്. പ്രവീണുമായി ബന്ധപ്പെട്ട ഫോൺ വിളികളുടെ വിവരങ്ങളും വാട്‌സ് അപ്പ് സന്ദേശങ്ങളും യുവതി പോലീസിന് കൈമാറി. ഇതിന് മുൻപും ലൈംഗീക പീഡനക്കേസിൽ സൺ ടിവിയിലെ മുതിർന്ന ഉദ്യോഗസ്ഥർ ഉൾപ്പെട്ടിട്ടുണ്ടായിരുന്നു. 2013 മാർച്ചിൽ സൺ ടിവി ചീഫ് എഡിറ്റർ വി രാജയെയാണ് സമാന സംഭവവുമായി പോലീസ് കസ്റ്റഡിയിലെടുത്തത്. അഖില എന്ന വാർത്താ അവതാരകയായിരുന്നു രാജക്കെതിരെ ആരോപണം ഉന്നയിച്ചത്. ഈ കേസിന്റെ നടപടികൾ പുരോഗമിക്കുന്നതിനിടയിലാണ് പുതിയ ലൈംഗികാരോപണം പുറത്ത് വന്നത്.